Нийслэлийн “Өргөө” амаржих газрынхан хохирлоо шүүхээр шийдүүлнэ

Нийслэлийн “Өргөө” амаржих газрын Эмэгтэйчүүдийн мэс заслын өрөөний тааз нурсан талаар 2016 оны аравдугаар сарын 7-нд тус эмнэлгийн удирдлагууд хэвлэлийнхэнд мэдээлж байсан билээ. Тухайн үед азаар хүний амь эрсдээгүй ч нийт 69.5 сая төгрөгийн өртөг бүхий тоног, төхөөрөмж эвдэрч, эмнэлэг мэс засал хийж чадахгүйд хүрч, төлөвлөгөөт 20 гаруй мэс заслыг цуцалсан гэдэг.

Тус өрөөг “Центро гоулд” ХХК-ийн 7.2 сая төгрөгийн буцалтгүй тусламжаар 2013 оны нэгдүгээр сард барьсан бөгөөд гүйцэтгэгчээр нь “Цаст констракшн” ХХК ажиллажээ. Эмнэлгийн удирдлагууд чанаргүй материалаар барилга барьсан тус компаниас хохирлоо барагдуулахыг хүссэн ч өдий хүртэл нэг ч төгрөг өгөөгүй тул шүүхэд хандсан байна.

Нийслэлийн “Өргөө” амаржих газрын хэвлэл мэдээлэл, олон нийттэй харилцах мэргэжилтэн Б.Оюунбилэгээс энэ талаар тодруулахад “Нурсан өрөөнд дахин ямар ч мэс засал хийгээгүй, битүүмжилсэн. Одоогоор тэдэнд эрүүгийн хэрэг үүсгэсэн байгаа. Шүүхийн шийдвэр гарахыг л хүлээж байна. Яаралтай мэс засал хийлгэх шаардлагатай хүмүүсээ бид ЭХЭМҮТ рүү явуулж, энгийн мэс заслаа эмнэлэгтээ хийж байгаа” гэв. Харин “Цаст констракшн” ХХК-ийнхантай холбогдох гэсэн боловч утсаа авах хүн байсангүй.

Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)

Илгээх

Энэ тухай