МСБХ-ны “Дээд лиг” хэзээ эхлэх нь тодорхойгүй болжээ

Монголын сагсан бөмбөгийн холбооны удирдлагууд энэ сарын 9-нд сэтгүүлчидтэй уулзаж, хэсэг бүлэг хүмүүс МСБХ-ны үйл ажиллагаанд саад хийж, холбооны тамга тэмдгийг булаан авахыг санаархаж байна хэмээн мэдэгдсэн юм. Түүнчлэн Спортын төв ордонд цаг гаргаж өгөөгүйгээс “Дээд лиг”-ийг ирэх хоёрдугаар сард зохион байгуулах асуудал гацаанд орсон гэж буй. Тэгвэл уг хуралтай холбоотойгоор БТСГ-аас өчигдөр хэвлэлийн бага хурал зарласан. Энэ хуралд БТСГ-ын дарга С.Шаравжамцыг оролцох болов уу хэмээн таамаглаж байсан ч тэрбээр ирээгүй юм. Харин Засгийн газрын хэрэгжүүлэгч агентлаг, БТСГ-ын спортын төв ордны менежер Г.Нямдорж оролцлоо. Тэрбээр “Манай байгууллагад “Дээд лиг”-ийг зохион байгуулах хүсэлт ирээгүй. Нэгдүгээр сар гараад спортын ордонд бусад төрлийн УАШТ-ийг зохион байгуулдаг. Энэ хугацаанд зөвхөн сагсан бөмбөгийн холбоонд заал түрээслүүлэх боломжгүй. Заалаа өгөхгүй гэсэн ямар нэг шийдвэр гараагүй байхад ийм зүйл ярьж буй нь буруу” гэсэн юм.

Харин МСБХ-ны нарийн бичгийн дарга С.Тулга “Бид “Дээд лиг”-ийг зохион байгуулах хүсэлтээ өнгөрсөн оны арванхоёрдугаар сарын 1-нд өгсөн. Харамсалтай нь, ийм бичиг өгөөгүй гэсэн тайлбар авлаа. Тэгвэл өнөөдөр сэтгүүлч олны өмнө энэ хүсэлтээ өглөө” гэж ярив.       

Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)

Илгээх

Энэ тухай