Египетийн Засгийн газар огцров

Египетийн Ерөнхийлөгч Абдель Фаттах ас-Сиси Засгийн газраа огцруулж, Сайд нарын шинэ танхим бүрдүүлэхийг Нефтийн аж үйлдвэрийн сайд Шериф Исмаилд үүрэг болгосон байна. ХАА-н сайд Салах Хилял нь авлигын хэрэгт орооцолдон энэ сарын 7-нд баривчлагдсаны улмаас Ерөнхий сайд Ибрагим Махляб өөрийн тэргүүлсэн Засгийн газрыг огцрох ёстой гэж үзэж хүсэлтээ илэрхийлсэн аж.

Газрын зөвшөөрөл олгосны хариуд Хилялыг хахууль авсан хэмээн буруутгажээ. Олон түмний өмнө хэлсэн үг нь нийгмийн зүгээс шүүмжлэл хүлээсэн тул Хууль зүйн сайд Махфуз Сабер нь тавдугаар сарын 11-нд огцорсон юм. Тэрбээр шүүхийн шүүгч хүн “хөрөнгө чинээтэй, өндөр ёс суртахуунтай гэр бүлд хүмүүжсэн байх ёстой, цэвэрлэгчийн хүүхдүүд мэдэхгүй чадахгүй юмтай тулгарч, сэтгэл санааны хямралд орж болзошгүй тул өөртөө илүү тохирох ажил хайх нь зүйтэй” гэсэн утгатай юм хэлчихсэн аж.

2013 оны долдугаар сард Египетэд цэргийн эргэлт зохион байгуулж, “Лалын ахан дүүс” хэмээх шашны бүлэглэлийн дэмжлэг хүлээж байсан Ерөнхийлөгч Мухаммед Мурсийг түлхэн унагаасан юм. Тэгээд Абель Фаттах ас-Сисиг 2014 оны зургадугаар сард Ерөнхийлөгчөөр сонгосон. Мурсийг 20 жил шоронд хорих ялыг 2015 оны дөрөвдүгээр сард шүүх гаргасан. Египетэд энэ намар Парламентын сон­гууль хийхээр төлөвлөж буй. Эхний шат нь аравдугаар сарын 18-19-нд, хоёр дахь шат нь арваннэгдүгээр сарын 22-23-нд болох юм.

Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)

Илгээх

Энэ тухай