МУИС-ийн оюутнууд OУ-ын мэтгэлцээний тэмцээнд 3-р байр эзэллээ

МУИС-ийн оюутнууд OУ-ын мэтгэлцээний тэмцээнд 3-р байр эзэллээ

Олон Улсын Улаан загалмайн хороо, Хонг Конгийн улаан загалмай нийгэмлэг, Хонг Конгийн их сургууль хамтран зохион байгуулдаг Ази-Номхон Далайн орнуудын Олон улсын хүмүүнлэгийн эрх зүйн шүүхийн мэтгэлцээний 16-р тэмцээн энэ оны 3-р сарын 6-10-ны өдрүүдэд Хонг Конг хотод зохион байгуулагдаж МУИС-ийн ХЗС-ийн баг Шүүхийн мэтгэлцээний OУ-ын тэмцээнд 3-р байр эзэллээ.

Уг тэмцээнд дэлхийн шилдэг 100-н их сургуулийн жагсаалтад багтдаг Бээжингийн их сургууль (#27), Хонг Конгийн Их Сургууль (#40), Токиогийн Их Сургууль (#46), Австралийн Нью Саут Валийн Их Сургууль (#85) зэрэг Ази-Номхон далайн бүсийн 21 улсын хорин таван их сургуулийн шилдэг багууд өрсөлдсөн юм.

Энэ удаагийн тэмцээнд МУИС-ийн Хууль зүйн сургуулийн баг прокурорын талаас гаргасан тайлбараараа 3 дугаар байр эзэлж байгаа нь  анхны шагналт байр бөгөөд амжилтын гараагаа эхлүүлж байна. МУИС-ийн багт Хууль зүйн сургуулийн эрх зүйн оройн хөтөлбөрийн 2 дугаар ангийн оюутан Б.Мягмардорж, Г.Энх-Амгалан, олон улсын эрх зүйн 4 дүгээр түвшний оюутан Б.Итгэл, 3 дугаар түвшний оюутан А.Мандуул нар оролцож, дасгалжуулагчаар МУИС-ийн ХЗС-ийн дэд профессор, доктор Д.Гангабаатар ажиллав.

Уг шүүхийн мэтгэлцээний тэмцээн нь Олон улсын гэрээ, конвенц, тэдгээр дээр үндэслэж гарсан Олон улсын эрүүгийн шүүхийн болон бусад шүүхийн шийдвэрийг өгөгдсөн кейс дээр хэрэглэх байдлаар явагддаг. Ингэснээр оюутны кейс болон түүнд холбогдох хуулийн зохицуулалтыг судлах, анализ хийх, үндэслэл бүхий гаргалгаагаа шүүгчдийн өмнө илтгэж, мэтгэлцэх ур чадварыг хөгжүүлэх зорилготой. Шүүхийн мэтгэлцээний тэмцээний оролцоо, эзэлсэн байр суурь нь гадаад улсуудад хуулийн сургуулийн чансааг тогтооход чухал үзүүлэлт болдог байна.

Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)

Илгээх

Энэ тухай