БНСУ руу нисэх шууд нислэгийн тоог нэмэх асуудлаар санал солилцов

Монгол Улсын сайд, Засгийн газрын Хэрэг эрхлэх газрын дарга Г.Занданшатар БНСУ-аас Монгол Улсад суугаа Элчин сайд У Суныг 2017 оны арваннэгдүгээр сарын 23-ны өдөр хүлээн авч уулзлаа.

Ардчилал, хүний эрх, эрх чөлөөг эрхэмлэдэг нийтлэг үнэт зүйлстэй БНСУ-тай найрсаг харилцаа, хамтын ажиллагааг хөгжүүлэх нь Монгол Улсын гадаад бодлогын тэргүүлэх чиглэлийн нэг. Засгийн газар энэ залгамж чанарыг хадгалж Иж бүрэн түншлэлийн харилцааг бүх талаар өргөжүүлэн хөгжүүлэхийн төлөө байна гэдгийг сайд Г.Занданшатар тэмдэглэв.

БНСУ ОУВС-ийн хөтөлбөрийн хүрээнд 500 сая ам.долларын хөнгөлөлттэй зээл олгохоор шийдвэрлэсэнд талархал илэрхийллээ. Мөн Монгол Улсын Засгийн газар хууль дээдлэх, авлига, хүнд сурталтай тэмцэх, төрийн албаны бүх шатанд сахилга хариуцлага, дэг журмыг хангах чиглэлээр тууштай ажиллаж байгааг тодотгов.

Уулзалтын үеэр Монгол Улсын Ерөнхий сайдын БНСУ-д хийх айлчлал, БНСУ-ын хөнгөлөлттэй зээлээр 10 аймагт дулааны станц байгуулах, “Харгиа” цэвэрлэх байгууламжийг шинэчлэх төслийн хэрэгжилтийг эрчимжүүлэх, улс хоорондын шууд нислэгийн тоог нэмэх зэрэг асуудлаар санал солилцов

Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)

Илгээх

Энэ тухай