“60 тэрбум”-ын гэх хэргийг удахгүй шүүхэд шилжүүлэхээр болжээ

“60 тэрбум”-ын гэх тодотголтой, МАН-ын тухайн үеийн удирдах албан тушаалтнууд нийтийн албан тушаалыг худалдан мөнгө босгож, төрийн эрхийг хууль бусаар авахыг санаархсан гэх хэргийг тагнуул, АТГ-ынхан хамтарсан ажлын хэсгийнхэн шинээр илэрсэн нөхцөл байдлын улмаас өнгөрсөн оны наймдугаар сараас сэргээн шалгаж эхэлсэн юм. Өмнө нь НПГ-аас хэрэгсэхгүй болгосон уг хэргийг бүтэн жил гаруй мөрдөөд энэ сарын эхээр яллах дүгнэлт үйлдүүлэн шүүхэд шилжүүлэх саналтай ТЕГ-ын Мөрдөн байцаах газраас прокурорын хяналтад хүргүүлжээ.

“60 тэрбум”-ын гэх схемийг санаачилж, танилцуулсан, улмаар хамтрагчидтайгаа тохиролцож чадалгүй бичлэгийг нь ил болгосон Г.Доржзодовт ямар нэг хариуцлага тооцохооргүй байгаа аж. Харин түүнийг нь хэрэгжүүлэхийг завдсан гэх “Шинэ Монгол хаад” ХХК-ийн захирал А.Ганбаатар, нийслэлийн МАН-ын дарга асан Ц.Сандуй нарын гэм буруутай, эсэхийг тогтоолгохоор удахгүй шүүхэд шилжүүлэхээр болж буйг эх сурвалжууд мэдээллээ.

Харин зарим хуульч “Энэ хэргийг шүүх улстөрийн өнцгөөс л хэлэлцэж ял шийтгэл ногдуулж болзошгүй. Хавтаст хэрэгт цугласан нотлох баримтын хүрээнд шийдэх боломж хомс. Хуулийн дагуу шийдвэрлэвэл уг хэрэг хэрэгсэхгүй болох байх” хэмээж байгаа юм.

Бэлтгэсэн: Г.Равжаа


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)