18-30 насны иргэдийг Улаанбурхны эсрэг нэмэлт дархлаажуулалтад хамруулна

Нийслэлийн удирдлагын зөвлөлийн ээлжит хуралдаан болж, Улаанбурхан, Томуу, томуу төст өвчний талаарх мэдээллийг сонслоо.

2010-2014 онуудад Монгол Улсад Улаанбурханы өвчлөл бүртгэгдээгүй тул 2015 оны 03 дугаар сард Дэлхийн Эрүүл мэндийн байгууллагаас “Улаанбурхан өвчнийг тууштай бууруулсан” гэсэн батламжийг авч байсан. Гэвч 2015 оны 03 сарын 18-нд Нийслэлийн Баянзүрх дүүрэгт Улаанбурханы анхны тохиолдол мэдээлэгдсэн. Тус өвчин нь БНХАУ, ОХУ болон дэлхийн 110 гаруй оронд бүртгэгдээд байна. Өвчлөлийн шалтгаан нь БНХАУ, ОХУ-аас зөөвөрлөгдөн орж ирснээс гадна дархлаажуулалтад хамрагдаагүй, дархлаа нь суларсан хүмүүсийн бүлэг бий болсонтой шууд холбоотой гэдгийг Нийслэлийн Эрүүл мэндийн газраас мэдээллээ. 2015 оны 05 дугаар сарын сүүлээс 6 сартайгаас 6 нас хүртэлх 156322 хүүхдийг Улаанбурханы нэмэлт дархлаажуулалтанд хамруулсны дараа өвчлөл буурч эхэлсэн. Харин 2 дугаар сараас 15-29 насны оюутан залуучуудын дунд өвчлөл нэмэгдэх хандлагатай байна.

Өвчлөл нэмэгдсэнтэй холбогдуулан нийслэлийн Өрхийн Эрүүл мэндийн төвүүдийн ажиллах цагийг уртасгах, Засгийн газрын нөөц хөрөнгөөс хөрөнгийг шийдвэрлэж орчин үеийн идэвхтэй халдваргүйжүүлэлтийн бодисыг нийслэлийн харъяа ЭМБ-уудад хуваарилжээ. Голомтын идэвхтэй хэсэгт багтаж буй их, дээд сургууль, ЕБС-ийн ахлах анги, албан байгууллагын 27331 иргэнийг вакцинжуулсан байна. Цаашид 5 дугаар сараас эхлэн 18-30 насны иргэдийг Улаанбурхан өвчний эсрэг нэмэлт дархлаажуулалтыг зохион байгуулахаар төлөвлөжээ.

Хуралдааны үеэр Нийслэлийн Эрүүл мэндийн газраас нийслэлийн хэмжээнд бэлгийн замын халдварт өвчнөөр өвчлөх иргэдийн тоо буурахгүй, өвчлөгчдийн нас залуужиж 13-14 насны өсвөр насны хүүхдүүд халдвар авах нь нэмэгдэж байгаа талаар нэмэлт мэдээлэл өглөө.

Нийслэлийн удирдлагын зөвлөлийн хуралдаанаар мэдээллийн дагуу дархалт ихтэй байгаа өвчний тархалтыг бууруулах асуудлаар онцгой анхаарч, бэлгийн замын халдварт өвчний асуудлаар тусгай арга хэмжээ авч холбогдох газруудтай хамтран ажиллах үүргийг Нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэл, Нийслэлийн Эрүүл мэндийн газарт үүрэг болголоо.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)