”Саусгоби сэндс”-тэй холбоотой асуудлыг эргэн харахыг хүсэв

Монголын “Гүйцэтгэх Захирлуудын Клуб” (CEO Club) нь 2009 онд байгуулагдсан бөгөөд Монгол Улсын нэр хүнд бүхий томоохон татвар төлөгч тэргүүний компаниудыг эгнээндээ нэгтгэдэг. Гишүүн компаныхаа эрх ашгийг хамгаалах үүрэгтэй учир "Саусгоби сэндс"-тэй холбоотой асуудлыг эргэн харахыг шүүхээс хүсэв.

Монгол Улсын Татварын Ерөнхий хууль, Захиргааны хэрэг хянан шийдвэрлэх тухай хуулиар татварын асуудлыг захиргааны журмаар шийдвэрлэх боломж байсаар байтал "Саусгоби сэндс" компанийг дааж давшгүй их хэмжээний 35.3 тэрбум төгрөгөөр торгож, хуучин ажилтнуудыг нь маш хатуугаар, шударга бус байдлаар эрүүгийн хэрэгтэн болгож шийдвэрлэсэнд Гүйцэтгэх захирлуудын клубын гишүүд  харамсаж байгаагаа илэрхийлэн шүүхэд хүсэлтээ уламжилжээ. Энэ нь зөвхөн нэг компанийн асуудал биш. Татварын хууль, тогтоомж, хуулийг хэрэгжүүлэх аргачлал дутмаг, тодорхойгүй байдлын улмаас татварын байгууллага болон татвар төлөгчдийн дунд ойлголтын зөрүү гарч түүний улмаас татварын маргаан үүсдэг. Жишээ нь дээрх 35.3 тэрбум төгрөгийн дийлэнх буюу 24.3 тэрбум төгрөг нь сүүлийн жилүүдэд үргэлжилсэн төгрөгийн уналтаас үүдэлтэй бөгөөд энэхүү шүүхийн шийдвэр нь манай улсад буруу жишиг тогтоон, гадаад валютын зээл, өглөгтэй бүхий л аж ахуйн нэгж, иргэдийг яллан хорих үндэс болж магадгүй болоод байна. Хууль эрх зүйн орчин боловсронгуй биш байгаагийн ачааг зөвхөн татвар төлөгчдөд тохдог, эрүүгийн хэрэгт татдаг арга практикийг өнөөдрөөс эхлэн таслан зогсооё, хуулийн заалтыг хүчингүй болгоё гэж уриалж байна гэж тэдний хүсэлтэд дурджээ. Хөрөнгө оруулалт, бизнесийн таатай орчин бий болгоход, эдийн засгийн хөгжлийг бүтээн байгуулахад чадварлаг хөдөлмөрийн зах зээл, гадаадын болон үндэсний өндөр ур чадвартай мэргэжилтнүүд асар их үүрэг гүйцэтгэдэг, тэдний хүч хөдөлмөрөөр бүтээн байгуулалт хийж байна. Иймд үүссэн нөхцөл байдалд яаралтай дүн шинжилгээ хийж, "Саусгоби сэндс" ХХК-ийн ажилтан асан Жастин Капла, Хиларион Кажуком, Кристобал Дэвид нарыг батлан даалтад гаргаж, улмаар өршөөл үзүүлж, тус  ХХК-ийн олон зуун ажилтнуудын ажлын байр, аж амьдралыг хамгаалж, уг хэргийг зохих хууль, журмын дагуу шийдвэрлэхийг Гүйцэтгэх захирлуудын клубээс  уриалсан байна.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)