“Эрүүл иргэн" аян амжилттай хэрэгжиж байна

Нийслэлийн Засаг даргын санаачилсан “Эрүүл иргэн” аяны хүрээнд иргэдийг дотор, мэдрэл, зүрх судас, ахмад настан, хүүхэд, нүд, чих хамар хоолой, хавдар, сүрьеэ, эмэгтэйчүүд зэрэг төрөлжсөн нарийн мэргэжлийн эмчийн үзлэг, оношилгоонд хамруулж буй.

Мөн ЭХО, рентген, зүрхний бичлэг зэрэг багажийн шинжилгээ, түргэвчилсэн оношлуураар чихрийн шижин, хөх умайн хүзүүний өмөн, хавдар, БЗДХ зэргийг илрүүлэх цусны шинжилгээнд иргэдийг хамруулж эмчилгээ, зөвлөгөө өгч ажиллаж байгаа аж.

Тэгвэл уг аяны явцтай танилцахаар Нийслэлийн Эрүүл мэндийн газрын ажлын хэсэг Баянгол дүүрэгт ажиллаж, иргэдийн санал сэтгэгдлийг сонсжээ. Тус дүүргийн хувьд 4 дүгээр хорооны “Угтахуй”, 5 дугаар хорооны “Дэшиг Дун”, 6 дугаар хорооны “Мөнх Үжин” ӨЭМТ-д дотор, зүрх судас, мэдрэл, чих хамар хоолой, доторын ЭХО, эмэгтэйчүүд, сүрьеэ болон элэгний В,С вирусын эрт илрүүлэг, тэмбүүгийн илрүүлэг үзлэгт иргэдийг хамруулж байгаа аж.

“Эрүүл иргэн” аяны хүрээнд төрөлжсөн нарийн мэргэжлийн эмч нарын үзлэг, оношилгоонд хамрагдаж буй иргэдийн хувьд дүүргийн эрүүл мэндийн төв, лавлагаа шатлалын эмнэлгээр үйлчлүүлэх гэж цаг заваа алдалгүй, харьяа Өрхийн эрүүл мэндийн төвдөө хандах боломжтой болсондоо тун сэтгэл хангалуун байгаагаа илэрхийлсэн юм.

Мөн халдварт болон халдварт бус өвчлөлөөс урьдчилан сэргийлэх, эрт үед нь илрүүлж эмчилгээнд хамрагдах, амьдралын зөв дадал хэвшилтэй болох, яаралтай үед үзүүлэх анхан шатны тусламж, үйлчилгээний талаар зөвлөгөө мэдээлэл авч байна.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)