Чойбалсангийн ДЦС-ыг өргөтгөх хятад ажилтнууд Монголд иржээ

Дорнод аймгийн Чойбалсангийн дулааны цахилгаан станцыг 50 мегаваттаар өргөтгөх болсон. Уг ажлыг БНХАУ-ын ТВЕА группийнхэн гүйцэтгэхээр тендерт шалгарсан билээ. Тэгвэл тус компанийн инженер, техникийн 31 ажилтан уржигдар Замын-Үүдийн боомтоор Монголд иржээ. Хятад ажилтнуудыг Дорнодын “Чойбалсан” зочид буудалд тусгаарлалаа. Тэднийг 21 хоногийн хугацаанд тусгаарлаад, дахин шинжилгээ авах юм. Тус станцын өргөтгөлийг БНХАУ-ын Хөгжлийн банкны 70 гаруй сая ам.долларын зээлээр барина. Гүйцэтгэгч компани 18 сарын хугацаанд ажлаа дуусган, хүлээлгэн өгөх гэрээтэй аж. Засгийн газрын тогтоолоор дээрх ажлыг гүйцэтгүүлэхэд БНХАУ-аас 250 ажилтан оруулж ирэх байсан. Гэхдээ хорио цээрийн дэглэмээс шалтгаалан эхний ээлжид инженер, техникийн 31 ажилтныг Монгол руу нэвтрүүлжээ. Үүнээс гадна Улаанбаатар-Дархан-Уул чиглэлийн замыг барихад нарийн мэргэжлийн 100 гаруй инженер хэрэгцээтэй байгаа. Эхний ээлжид энэ сарын 9-нд БНХАУ-ын 35 иргэнийг Замын-Үүдийн боомтоор нэвтрүүлжээ. Тэднийг мөн л тусгаарлаж, шинжилгээнд хамруулаад байна.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)