Ц.Оюундар ь: Засгийн газар үйл ажиллагаагаа үргэлжлүүлэх эрх зүйн чадамжтай

 Засгийн газрын бүрэлдэхүүнээс сайд нараа татах МАХН-ын мэдэгдлийн талаар АН-ын ерөнхий нарийн бичгийн даргын үүрэг гүйцэтгэгч Ц.Оюундариас тодрууллаа.

-АН-ын тэргүүлсэн Засгийн газраас гарах тухайгаа МАХН эрс мэдэгдээд байна. Танай нам МАХН-ын алхамд ямар хариу барих вэ?

-АН Засгийн газраа байгуулахдаа “Шударга ёс” эвсэлтэй гэрээ байгуулсан. “Шударга ёс” эвсэлд МАХН, МҮАН гэсэн хоёр нам багтдаг. Засгийн газраас гарна гэдэг нь МАХН-ын Гүйцэтгэх товчооны л шийдвэр шүү дээ. Тиймээс бид эвслийн шийдвэрийг хүлээж, Засгийн газрынхаа цаашдын үйл ажиллагааг хэрхэхийг шийднэ.

-МАХН, МҮАН-ын аль нэг нь Засгийн газрыг орхих тохиолдлыг хэрхэн зохицуулах талаар “Шударга ёс” эвсэлтэй байгуулсан гэрээнд тусгасан уу?

-Гэрээнд салбал ингэнэ, тэгнэ гэж гэрлэлтийн гэрээнд заадаг шиг тусгаагүй. Ямар үүрэг хариуцлагатай ажиллах вэ гэдэгт анхаарч, энэ талаар л заасан.

-Ер нь аль нэг нам шинэчлэлийн Засгийн газраас гарах магадлалыг тооцож үзсэн үү?

-Мэдээж тооцсон. Гэхдээ энэ тухай ярихад эрт байна. Засгийн газар огцордог маш тодорхой хоёр тохиолдлыг хуульд заасан байдаг. МАХН-ын сайд нар Засгийн газраас гарлаа ч, нийт сайд нарын тэн хагаст хүрэхгүй учраас шинэчлэлийн Засгийн газар үйл ажиллагаагаа үргэлжлүүлэх эрх зүйн чадамжтай.

Б.Энхээ


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)