Х.Бат-Ялалтыг цагдан хорьсон нь үндэслэлтэй гэж үзэв

Чингэлтэй дүүргийн Эрүүгийн хэргийн анхан шатны шүүхийн шүүгчийн захирамжаар өнгөрсөн баасан гарагт “Иргэдийн шударга шүүх” төрийн бус байгууллагын тэргүүн Х.Бат-Ялалтыг 30 хоногийн хугацаанд цагдан хорихоор болсон билээ. Түүнийг 2016 оны УИХ-ын сонгуулийн үеэр гишүүн асан, АН-аас нэр дэвшигч Л.Эрдэнэчимэгийг шантаажилж 50 сая төгрөг авсан хэрэгт Эрүүгийн хуулийн 17.6-д заасан “Бусдын эд хөрөнгийг авахаар заналхийлэх” гэх үндэслэлээр буруутган яллагдагчаар тооцоод байгаа юм. Х.Бат-Ялалтыг өнгөрсөн баасан гарагт ШШГЕГ-ын харьяа Цагдан хорих 461 дүгээр анги руу аваачихаар болоход шүүхийн гадна зарим хүн ёс зүйгүй авирлаж, хуяглан хүргэж буй автомашины өмнүүр орж хэвтэх зэрэг үйлдэл гаргасан. Харин үүний дараа УИХ-ын гишүүн асан Г.Уянга “Х.Бат-Ялалт хоригдоод байгаа юм байна. Бусдаас мөнгө авч хоёр эмэгтэйг зэрэг хөнтөрснөө тайлбарласан нь дээр дээ” хэмээн үзэл бодлоо илэрхийлсэн байв. 

Уг нь Х.Бат-Ялалтад хууль сахиулах байгууллагаас эрүүгийн хэрэг үүсгэж, яллагдагчаар татан мөрдөн байцаалт явуулах явцад энэ сарын 11, 13, 17-нд прокуророос хэргийн материал танилцуулах зорилгоор түүнд мэдэгдэх хуудас хүргүүлж, дуудсан боловч хүндэтгэн үзэх шалтгаангүйгээр очоогүй юм байна. Тиймээс Эрүүгийн хэрэг хянан шийдвэрлэх тухай хуулийн 14.9-1.4-т заасан “Прокурорын мэдэгдэх хуудсаар дуудахад хүндэтгэн үзэх шалтгаангүйгээр ирээгүй тохиолдолд шүүх яллагдагчийг цагдан хорих шийдвэр гаргана” гэснийг үндэслэн цагдан хорьсон юм. Уг захирамжийг эс зөвшөөрч яллагдагч Х.Бат-Ялалт, түүний өмгөөлөгч С.Даваасүрэн нар Чингэлтэй дүүргийн Эрүүгийн хэргийн анхан шатны шүүхийн ерөнхий шүүгчид гомдол гаргасныг өчигдөр хянан хэлэлцээд гуравдугаар сарын 27-ны 75/Я дугаартай яллагдагчаар цагдан хорих таслан сэргийлэх арга хэмжээ авах тухай шүүгчийн захирамж нь хууль ёсны үндэслэлтэй гэж үзжээ.

Бэлтгэсэн: Г.Равжаа


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)