Хөдөлмөрийн үнэ цэнийг мэдрээгүй хүмүүс

Эгэл жирийн иргэд хэдэн арван цаас олон амьдралаа үргэлжлүүлэх гэж хуруу хумсаа хугалахаас наагуур хөдөлмөрлөж яваа тэдний эд зүйл, хөрөнгийг нь хулгайлан, тарчлаан зовоох боловсролгүй, залхуу хүмүүс олширчээ.

Тэд баян цатгаландаа биш, хайрт эцэг, эх, халамжит хань, өхөөрдөм бяцхан үрээ өлсгөхгүй, дааруулахгүй, бусдын адил л амьдруулах гэсэндээ хөдөлмөрлөж, авсан хэдэн төгрөгөө амьдралдаа хүргэх гэж халааслан явсныг хорон муу санаатай, хүний хөдөлмөрийг үл хүндэлсэн, өлөн нүдтэнгүүд хулгайлчихдаг нь харамсалтай.

2019 оны эхний хагас жилийн байдлаар цагдаагийн байгууллагад халаасны хулгайн гэмт хэрэгтэй холбоотой 1831 өргөдөл, гомдол бүртгэгдсэнээс гэмт хэргийн шинжтэй 1088, зөрчлийн шинжтэй 743 байгаа юм. Үүнээс үзэхэд зургаан сард 1831 хүн өөрийн эд хөрөнгөө зөвхөн халааснаасаа алдсан байна. Яагаад хүний юмыг нууцхан аваад, тэрүүгээрээ өөрийнхөө амьдралыг залгуулаад байдгийг, яагаад тэдэн шиг барилга, үйлчилгээ, цагийн ажил хийгээд, ажил хөдөлмөр, цэвэр ариун, шударга хөлсний үнэ цэнийг мэдрэхгүй он жилүүдийг өнгөрөөд байдгийг ойлгох ухаан надад алга даа.

Гэхдээ эднээс суралцах зүй бас байх юм гээч. Халаасны хулгайчид цагийн тооцоотой ажилладаг нь харагдаж байгаа юм. Юу гэхээр нийт ажил сургууль эхлэх цаг буюу 06-14 цагийн хооронд 29 хувь, ажил сургууль тарах 15-19 цагийн хооронд хамгийн их буюу 47 хувь нь бүртгэгдсэн талаар холбогдох алба хаагчид хэлж байсан юм. Тэд цагийн төлөвлөгөөтэй ажиллаж, амьдардаг юм байна.

Өөрийн эд зүйлээ хийж байгаараа гэж үйлдвэрийн оёдолчид халаас гэдэг зүйлийг хийдэг атал, хэн нэгэн дураараа хүрч хөдөлмөрлөж олсон хэдэн арван цаас, хоолны мөнгөнөөсөө ч хасч хадгалж хадгалж авсан гар утас, өвөө, эмээ, аав, ээжээсээ зээлэн авсан сургалтын төлбөрийг хулгайлчхаад гэмгүй явдаг та бүхнийг бурхан өршөөг.

Хичээлийн шинэ жил эхлэх гээд хот, хөдөөгүй л бум бужигнаж, түм түжигнэх энэ үеэр нөгөө хэдэн шилийн сайн эрүүд маань тун чиг их баярлан явах нь дамчиггүй. Анхаарал, болгоомж бидэнд хэзээ ч илүүдэхгүй тул хүмүүс олноор цугласан зах, худалдааны төв, үйлчилгээний газар, тээврийн хэрэгсэлд өндөр сонор сэрэмжтэй байх нь хэрэгтэйг анхааруулж байна.

Учир нь тэд одоо л та бүхний шударгаар хөдөлмөрлөж, нойртой нойргүй, хоолтой хоолгүй явж олсон хэдэн төгрөгийг халааснаас чинь суга татан авахдаа бэлдээд нойр нь ч хүрэхгүй сууж байхыг үгүйсгэхгүй. Зарим нь аль хэдийн цагдаагийн газрын үүдэнд “ахаа миний буруу намайг явуулчихаач, ахиж хулгай хийхгүй” гээд цайны хэдэн үгээ хэлээд, өрөвдүүлэх гэж том том нулимс унагаад сууж байхыг үгүйсгэхгүй.

Халаасны хулгай гэдэг үгийг Хэзээ мартах юм бол доо... Жилээс жилд халаасны хулгайн гэмт хэргийн гаралт буурч байгаа, цагдаагийн байгууллага урьдчилан сэргийлэх арга хэмжээ авч ажиллаж байгаа боловч хэрэг, зөрчил гарсаар байгаа нь амьдралынхаа зуршил болгосон тэдэнд хууль, дүрэм сулдаад байгаа ч юм шиг. Иргэдийн шударга хөдөлмөр, ариун цагаан үйлсийг үнэлж шилийн сайн эрс минь хулгай хийхээ болих цаг энүүхэнд байгаасайдаа.

Алтан намар ирж ажил, амьдрал ч ихсэх энэ үеэр анхаарал болгоомжоо алдалгүй хүнийг гэх сэтгэлгүй тэднээс хол байж, өөрийн эд зүйлээ болгоомжтой авч явж халаасны хулгайн гэмт хэрэгт та ч бас урьдчилан сэргийлээрэй.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (1)