Хилээр байлдааны галт зэвсэг нэвтрүүлэхийг завдлаа

Сэлэнгэ аймаг дахь Алтанбулаг хилийн боомтоор ОХУ-аас ирсэн манай улсын хоёр иргэн байлдааны зориулалттай галт зэвсэг нэвтрүүлэхийг завдсаныг хилчид илрүүллээ. Иргэн Ч, А нар 88-88 УН улсын дугаартай гурван дугуйт мотоцикл хөлөглөн энэ сарын 8-ны 19.25 цагт хил нэвтрэхэд нь тээврийн хэрэгслийн үзлэг хийсэн байна. Гэтэл тэд 7.62 мм-ийн “АК-103” маркийн байлдааны буу, ОХУ-ын “Ф-1” болон Испанид үйлдвэрлэсэн “Denix” загварын гар бөмбөг (гранат) тус бүр нэг, 7.62 мм-ийн 89 ширхэг сумны хамт тээшиндээ нууж явжээ. Хилийн манаанд үүрэг гүйцэтгэж байсан дэд ахлагч Б.Болор-Эрдэнэ энэ үйлдлийг илрүүлж, ТЕГ-ын харьяа Хилийн тагнуулын тасагт шилжүүлээд буй аж. Сонор сэрэмж, мэргэжлийн ур чадвар гарган хилийн зөрчил илрүүлсэн дэд ахлагч Б.Болор-Эрдэнийг ХХЕГ-ын даргын тушаалаар Монгол Улсын “Онц хилчин” цол, тэмдгээр шагнажээ.

Бэлтгэсэн: Г.Орчлон


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)