""Улаанбаатар" кино наадам нь нийслэлчүүддээ барьж буй том бэлэг юм"

Улаанбаатар хотыг соёл, урлаг тэр дундаа кино урлагаар дамжуулан олон улсад сурталчлах, соёл урлагийн салбарын хамтын ажиллагааг хөгжүүлэх, дэлхийн нэр хүндтэй наадмуудад шалгарсан кино бүтээлийг Монголын үзэгчдэд хүргэх зорилгоор "Улаанбаатар” олон улсын кино наадмыг зохион байгуулж байна. 11 дэх удаагийн наадмаар есөн орны 18 кино бүтээлийг үзэгч олонд толилуулах бөгөөд Монгол киноны уралдаант хэсэг, Олон улсын уралдаант бус хэсэг, Онцлох орны кино хөтөлбөр, Кино форм, сургалт гэсэн таван хэсгээс бүрдэж байгаа юм.

Кино наадмын нээлтийн өдөр 2019 оны Венецийн Олон улсын кино наадмын шилдэг найруулагчийн шагналд нэр дэвшсэн Францын кино найруулагч Фабиен Бертодын “Ер бусын ертөнц” уран сайхны киног үзэгчдэд хүргэлээ. 

Кино наадмын нээлтийн арга хэмжээнд хотын дарга С.Амарсайхан уригдан ирж хэлсэн үгэндээ “Улаанбаатар хотынхоо түүхт 380 жилийн ойг тохиолдуулан энэ жилийн наадмыг Нийслэлийн Засаг Даргын Тамгын Газраас санхүүжүүлж, Монголын Урлагийн Зөвлөл, Монголын Кино Урлагийн Зөвлөл, Швейцарын Хөгжлийн Агентлаг, Бүгд Найрамдах Франц Улсын ЭСЯ, Монгол дахь “Гёте” Институт, Австралийн ЭСЯ зэрэг гадаад, дотоодын олон байгууллагатай хамтран өргөн хүрээг хамруулан хийж байгаа нь наадмын цар хүрээг илтгэж байна. Кино урлагийн гайхамшигт ертөнцөөр 7 хоногийн турш аялж, дэлхий дахины орчин үеийн арт хаус киноны бүтээлүүдийг шимтэн үзэж, таалан соёрхохыг та бүхэндээ хүсэн ерөөе” гэлээ.

Монгол Улсын Ардын жүжигчин, кино найруулагч, зохиолч Г.Жигжидсүрэн “Улаанбаатар” нэртэй кино наадам нь Монгол Улсыг дэлхий дахинд кино урлагаар дамжуулан сурталчилж байна. Оролцож буй олон улсын кино найруулагчдын уран бүтээлүүд их чансаатай бүтээлүүд байна. “Улаанбаатар” кино наадмыг анх зохион  байгуулахад нийслэлийн ЗДТГ дэмжин санхүүжүүлж ирсэн, одоо  ч мөн энэ наадмыг өндөр хэмжээнд зохион байгуулж байгаа нь нийслэлчүүддээ барьж буй том бэлэг гэж хэлж болно. Кинонд дуртай үзэгч түмэн, кино уран бүтээлчдийнхээ өмнөөс Улаанбаатар хотын ЗДТГ, Нийслэлийн Соёл Урлагийн газрын хамт олонд талархаж байна” гэдгээ илэрхийлсэн.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)