Төв болон говийн аймгуудын нутгаар 38 градус хүрч хална

Ойрын өдрүүдэд манай орны зүүн хагаст аагим халуун үргэлжлэх бол баруун аймгуудын нутгаар ялимгүй сэрүүсэх төлөвтэйг Цаг уур, орчны шинжилгээний газраас мэдээлэв. Ирэх сарын 3-ныг хүртэлх цаг агаарын урьдчилсан мэдээгээр маргааш, нөгөөдөр баруун аймгуудын ихэнх нутгаар дуу цахилгаантай бороо орно.

Алтай, Хангайн уулархаг бүсэд агаарын температур шөнөдөө 7-12, өдөртөө 20-25, Алтайн өвөр говиор шөнөдөө 17-22, өдөртөө 28-33, бусад нутгаар шөнөдөө 13-18, өдөртөө 25-30 градус дулаан байх аж. Хангай, Хөвсгөлийн уулархаг нутгаар мөн энэ сарын 2-ныг хүртэл дуу цахилгаантай бороо орох бөгөөд агаарын температур нутгийн баруун хэсгээр бага зэрэг сэрүүсэх боловч бусад нутгаар халах төлөв гарчээ.

Тухайлбал, Орхон, Сэлэнгэ, Туул голын саваар шөнөдөө 16-21, өдөртөө 32-37 градус, бусад нутгаар шөнөдөө 13-18, өдөртөө 28-33 градус дулаан байна.

Зүүн аймгуудын нутгаар маргааш, нөгөөдөр түр зуурын бороо орж, хойд хэсгээрээ ялимгүй сэрүүсэх боловч ирэх сарын эхээр ихэнх нутгаар шөнөдөө 17-22, өдөртөө 32-37 градус хүртэл халах аж.

Говийн аймгуудын нутгаар энэ сарын 2-нд дуу цахилгаантай бороо орох бөгөөд бусад хугацаанд хур тунадас унахгүй, агаарын температур шөнөдөө 18-23, өдөртөө 33-38 градус хүрч халах гэнэ.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)