ТҮК-үүдийн хувьчлалыг хүчингүй болгохгүй

Улсын Дээд шүүхийн хяналтын шатны захиргааны хэргийн шүүх хурлаар “Баянгол тохижилт”, “Баянзүрх тохижилт”, “Сүхбаатар тохижилт”, “Сонгинохайрхан дүүргийн тохижилт үйлчилгээ”, “Хан-Уул дүүргийн тохижилт үйлчилгээ” компанийн нэхэмжлэлтэй Нийслэлийн өмч хувьчлалын комисст холбогдох хэргийг хариуцагчийн итгэмжлэгдсэн төлөөлөгчийн гомдлын дагуу хэлэлцлээ. Нэхэмжлэгч ТҮК-ийн удирдлагууд Нийслэлийн өмч хувьчлалын комиссын 2013 оны нэгдүгээр сарын 30-ны 1-5 дугаар тогтоолыг хүчингүй болгуулахаар шүүхэд хандсан юм. Дээрх тогтоолуудаар уг таван дүүргийн тохижилт үйлчилгээний компанийн хувьчлалыг 2013 оны хоёрдугаар сарын 1-нээс хүчингүй болгож, нийслэлийн өмчид буцаан авсан юм.

Нийслэлийн Захиргааны хэргийн шүүх энэ хэргийг 2013 оны долдугаар сарын 15-нд хэлэлцээд Төрийн болон орон нутгийн өмчийн тухай хуулийн 34 болон 62 дугаар зүйлд заасныг баримтлан нэхэмжлэгч Баянгол, Баянзүрх, Сүхбаатар, Сонгинохайрхан, Хан-Уул дүүргийн ТҮК-иудын нэхэмжлэлийн шаардлагыг хангаж шийдвэрлэжээ. Захиргааны хэргийн давж заалдах шатны шүүхээс ч анхан шатны шүүхийн шийдвэрийг өөрчлөөгүй. Улсын Дээд шүүхийн хяналтын шатны Захиргааны хэргийн шүүх хурлаас дээрх хэргийг хянан хэлэлцээд анхан болон давж заалдах шатны шүүхийн шийдвэрийг хэвээр үлдээв.


Г.ЦОЛМОН


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)