С.Зоригийн амийг хороосон хэргийг улс төрд ашиглахгүй байхыг хүсжээ

Өнгөрсөн баасан гаргийн нэгдсэн хуралдааны эхэнд УИХ-ын дэд дарга Л.Энх-Амгалан гишүүн Ж.Батзандан, Л.Болд нарт Олон улсын парламентын холбоо (ОУПХ)-ны нэр барин худал ярихгүй байхыг анхаарууллаа. Тэд өмнөх өдөр нь мэдээлэл хийж, “С.Зоригийн амийг хөнөөсөн хэрэгт ял шийтгүүлсэн Б.Содномдаржаа, Т.Чимгээ нарыг эрүүдэн шүүсэн асуудалтай холбогдуулан ОУПХ-ноос бараг сарын өмнө ирүүлсэн дүгнэлтийг Гадаад харилцааны хэлтсийн дарга дарж байсан нь ажлаас чөлөөлөгдсөнийх нь дараа ил болсон” хэмээн мэдэгдсэн юм. Харин дэд дарга Л.Энх-Амгалан “Та бүхэн ажлаа хийцгээ, улстөржиж, “попрох”-оо боль. УИХ түр хороо байгуулсан. 

Түр хороо ажлаа хийх ёстой. ОУПХ-ноос Ж.Батзандан нарын 12 хүнд 2019 оны есдүгээр сарын 6-нд и-мэйл илгээсэн. И-мэйл хаягаа шалгаж бай, Ж.Батзандан. Орчуулгын ажил есдүгээр сарын 7-ноос эхэлсэн юм билээ. Л.Болд гишүүн та УИХ-д зургаан удаа сонгогдож, Гадаад харилцааны сайдаар ажиллаж байсны хувьд иймэрхүү байдлаар асуудалд хандаж болохгүй. 2012 оноос хойш ОУПХ-ны хуралд та бид хоёр таван удаа явсан. Тэр болгонд Хүний эрхийн дэд хороонд энэ асуудлаа хөндөн тавьж ирсэн. 2016 оноос УИХ, ОУПХ-ны харилцаа шинэ шатанд гарсныг эрх бүхий хүмүүс нь хэлж байгаа. Манай гурван ч гишүүн ОУПХ-нд сонгогдон ажиллаж байна. Та тавтиртай байх хэрэгтэй. Гадаад харилцааны хэлтсийн дарга халагдаж байж албан бичиг ил боллоо гэж худлаа ярихаа боль. ОУПХ-ноос ирүүлсэн 71 заалттай зөвлөмж надад байна. С.Зоригийн амийг хороосон хэргийг улс төрд ашиглахгүй байхыг энэ зөвлөмжөөр хүссэн” хэмээсэн юм.

Бэлтгэсэн: У.Наран


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)