РОМЕШ РАНГАНАТАН: Баримтат нэвтрүүлэгтээ Монголын тухай багтаана

Хошин урлагийн нэг төрөл болох стэнд-апаар Их Британид уран бүтээл туурвидаг Ромеш Ранганатан “UB comedy” клубийн урилгаар манай улсад зочилж, өнгөрсөн бямба гарагт тоглолтоо хийсэн юм. Тоглолтынх нь үеэр түүнтэй цөөн хором ярилцлаа.

-Монголд ирсэн сэтгэгдлээ хуваалцана уу?

-Миний хувьд танай орон холын, үл мэдэх ертөнц. Энд ирсэндээ баяртай байна. Энергийн төв, Баян-Өлгий аймагт очиж үзлээ. Нүүдэлчний уламжлалаа орчин үеийн хөгжилтэй хослуулан аж төрдөг их зочломтгой ард түмэн юм.

-Манай улсад зочлох үеэрээ баримтат нэвтрүүлэг бэлтгэж буй гэсэн. Энэ тухайгаа яриач?

-Би англичуудын төдийлөн аялж үзээгүй улсуудад зочилж, баримтат нэвтрүүлэг бэлтгэж буй юм. Хаити, Албани улс болон Хойд мөсөн далай руу аялсан. Үргэлжлүүлэн хэд хэдэн орноор аялж, нэвтрүүлгийн бичлэг хийнэ.


-“UB comedy” клубийн урилгыг хэрхэн хүлээж авсан бэ?

-Би аль нэг улсад тоглолтоо хийхдээ тухайн улсын хамгийн ирээдүйтэй уран бүтээлчээр тоглолтоо хөтлүүлэхийг хүсдэг. Тиймээс Б.Идэр-Одын урилгыг дуртайяа хүлээж авсан. Монголд стэнд-ап төрөл харьцангуй шинэ. Гэхдээ их эрчтэй хөгжиж буйг анзаарлаа.

-Стэнд-ап төрлийг хэзээнээс сонирхож эхэлсэн бэ?

-2010 оноос энэ төрлөөр үзүүлбэр үзүүлж байна. Их Британийн маш олон клубтэй хамтарч ажилладаг.

-Бусад уран бүтээлчээс ялгардаг таны онцлог юу вэ?

-Би Шри Ланка гаралтай англи хүн. Хоёр өөр үндэстний иргэшлийг өөрт шингээсэн нь миний гол онцлог. Түүнчлэн АНУ-ын алдарт уран бүтээлч Ричард Прайераас үлгэр дуурайл авдаг. Тэр хүний арга барил надаас цухалздаг ч байж мэднэ.

-Стэнд-ап төрлөөр дагнадаг олонх уран бүтээлч цомгоо гаргадаг юм билээ. Та гаргаж амжсан уу?

-Би энэ жил номоо гаргасан. Харин ирэх онд аялан тоглолтын бичлэгүүдээсээ шилж цомог гаргахаар төлөвлөсөн.

-Та дэлхийн хэчнээн улсад аялж, тоглолтоо хийсэн бэ?

-Австрали, АНУ, Норвег, Швед, Арабын нэгдсэн Эмират, Шотландад тоглолтоо хийсэн.

-Хаанахын үзэгчид танд хамгийн сайхан сэтгэгдэл төрүүлсэн бэ. Яагаад?

-Хэцүү асуулт байна. Гэхдээ Шотландын үзэгчид хамгийн их таалагдсан. Хошин урлагт маш дуртай, сэтгэл хөдлөл ихтэй хүмүүс юм билээ.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)