Оюутолгойн уурхайн эрчим хүчний зарим хэрэглээг Монгол Улс дотоодоосоо хангаж эхэллээ

Өнөөдөр “Оюу толгой” ХХК болон “Өмнөд Бүсийн Цахилгаан Түгээх Сүлжээ” ТӨХК хооронд “Цахилгаан эрчим хүчээр хангах гэрээ”-нд гарын үсэг зурах ёслол боллоо. 

Монгол Улсын Засгийн газраас Өмнөд бүс, говийн стратегийн орд газруудын цахилгааны хэрэглээг дотоодын эрчим хүчний системээс хангах зорилгоор 220 киловольт /кВ/-ийн гурван дэд станц, 670 км урттай цахилгаан дамжуулах агаарын шугамыг барьж дуусаад байна. Ингэснээр 13 мегавольт ампер суурилагдсан хүчин чадал бүхий 4 дэд станцыг 35 кВ-ын хүчдэлийн түвшингээр хангаж эхэллээ.

Ёслолын арга хэмжээний үеэр Эрчим хүчний сайд Н.Тавинбэх “Монгол Улсын Өмнийн говийн стратегийн ач холбогдол бүхий ашигт малтмалын орд газруудыг ашиглах, эдийн засгийн эргэлтэд оруулах, тэдгээрийг цахилгаан эрчим хүчээр хангах арга хэмжээг Монгол Улсын Их Хурал, Монгол Улсын Засгийн газраас 2008 оноос эхлэн үе шаттайгаар хэрэгжүүлж ирсэн. Өнөөдөр байгуулж буй гэрээгээр Монгол Улсаас албан ёсоор цахилгаан эрчим хүчээ авч эхлэх төдийгүй эдийн засагт эерэг үр дүн авчрах юм” гэлээ.

Мөн ‘Оюу толгой’ ХХК-ийн гүйцэтгэх захирал Армандо Торрес “Энэхүү гэрээг байгуулсан нь манай компанийн хувьд маш чухал үйл явдал болж байгаагийн хажуугаар дотоодоос авах эрчим хүчний хэмжээгээ нэмэгдүүлэх манай хүчин чармайлтын нэг илэрхийлэл болж байна. Бид цаашдаа ч Эрчим хүчний эх үүсвэрийн зохицуулалтын гэрээ, Эрчим хүчний эх үүсвэрийн зохицуулалтын нэмэлт, өөрчлөлтийн гэрээний хүрээнд нөөц боломжуудыг эрэлхийлэн Эрчим хүчний яамтай үргэлжлүүлэн хамтран ажиллах болно” гэлээ.

Оюу толгойн орд газрыг ашиглаж эхэлснээс хойш буюу 2013 оноос уурхай БНХАУ-ын ӨМӨЗО-ы эрчим хүчний системээс импортын цахилгаан эрчим хүч авч ирсэн.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)