Ойн түймрийг унтраахаар 1.3 мянга гаруй гал сөнөөгч ажиллаж байна

5d82e7d2a310cf3e979cf821.jpeg

Австралид ойн түймэр их хэмжээний өргөн газар нутагт тархаад байгаатай холбогдуулан Шинэ Өмнөд Уэлс мужид онц байдал зарлажээ.

Өчигдөр хийсэн мэдэгдэлдээ тус мужийн Засгийн газрын тэргүүн Глэдис Бережиклян Онц байдлын албаны зөвлөмжийг дагаж, нүүлгэн шилжүүлэхэд бэлэн байхыг ард иргэддээ анхааруулсан байна.

Шинэ Өмнөд Уэлс мужийн газар нутагт нийт 64 ойн түймэр асаж байгаагаас 40-ийг нь цурамд оруулж чадаагүй байна.

Ойн түймрийг унтраахаар 1.3 мянга гаруй гал сөнөөгч дайчлагдан, зуу гаруй тусгай техникийг ашиглаж байгаа ч Сидней хотын хойд хэсэг болон Хантер мужид хэт халалт, хүчтэй салхины улмаас нөхцөл байдал хүндрэх төлөвтэй байгаа аж.

Харин байгалийн гамшгийн улмаас  гурван хүн амиа алдаж, 30 гаруй хүн түлэгдсэн бол долоон хүн ор сураггүй алга болсон байна.

Мөн ойн түймэрт нийт 150 гаруй амины орон сууц, хэд хэдэн захиргааны байр өртжээ. Түймэрт автсан суурин газруудаас нийт зургаан мянга орчим хүнийг нүүлгэн шилжүүлж, тус мужийн газар нутаг даяар сургуулиуд хаалгаа бариад байна.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)