М.ТУЛГАТ: АН-ын Үндэсний бодлогын хороо даруй хуралдах ёстой

АН-ын даргын сонгуулийг ирэх сарын 16-нд зохион байгуулахаар товлосон ч хойшлуулсан. Энэ нь тус намын гишүүдийн дунд маргаан үүссэнтэй холбоотой гэж даргын үүргийг түр гүйцэтгэж байгаа Ц.Туваан мэдээлсэн билээ. Тэгвэл үүнтэй холбоотойгоор нийслэлийн ИТХ дахь АН-ын бүлгийн ахлагч М.Тулгат мэдэгдэл гаргалаа. Тэрбээр “Тамга түр хадгалагч” Ц.Туваан намын Хэрэг эрхлэх газрын даргыг томиллоо. Дахиад л дүрэмгүй аашлав. Төрийн сонгуулиар ялагдал хүлээсний дараа нэн түрүүнд зохион байгуулах ёстой ажил бол Үндэсний бодлогын хороо (ҮБХ)-г хуралдуулах юм. Үүнийг сонгуулийн санал хураалтын өдрөөс хойш 30 хоногийн дотор зохион байгуулах талаар үндсэн дүрэмд заасан. Өөрөөр хэлбэл, энэ сарын 24-нд хуралдах ёстой байтал товлоо ч үгүй байна. Үнэмлэхүй ялагдал хүлээсэн учраас сайн муу, алдаа оноогоо хэлэлцэх ёстой юм биш үү. Дахиад л хөшигний цаана тохиролцоо хийх нь” хэмээв. Түүнчлэн намын дүрэмд тусгасан, сонгуулийн дараа юу хийх ёстой талаарх заалтуудыг танилцуулж, эрх ашгаа хамгаалахыг гишүүддээ уриаллаа. Уг дүрмийн 5.17.6- д “Сонгуульд ялагдал хүлээлгэсэн, огцрох өргөдлөө өгсөн зэрэг үндэслэлээр ҮБХ-ны хурлаар намын даргыг чөлөөлж, намын их хурлыг зарлана. Энэ тохиолдолд дараагийн дарга сонгогдох хүртэл даргын эрх, үүрэг аль нэг дэд даргад шилжинэ” гэж заажээ. Мөн Ардчилсан нам УИХ-д хамгийн олон суудал аваагүй тохиолдолд намын дарга, дэд дарга, намын ерөнхий нарийн бичгийн даргыг огцорсонд тооцож, ҮБХ нь 30 хоногийн дотор хуралдаж, амжилтгүй оролцсон тойргуудад ҮБХ-ны гишүүний нөхөн сонгуулийг Дотоод сонгуулийн хорооноос явуулах, намын даргын сунгааг шударгаар зохион байгуулах талаар тусгасан байдаг аж.



Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)