Монгол, Австралиас Хятад руу нийлүүлсэн нүүрсний хэмжээ багасав

Хятад улсад өнгөрсөн арваннэгдүгээр сард Австралиас нийлүүлсэн нүүрсний хэмжээ багассан тухай “Reuters” мэдээлэв. Австралийн боомтууд дахь түгжрэл ихээхэн нэмэгдсэнтэй энэ нь холбоотой гэнэ. Тодруулбал, тус улсаас дээрх хугацаанд урд хөршид 5.59 сая тонн нүүрс экспортолсон нь жилийн өмнөхөөс 0.3 хувиар багассан дүн болжээ. Өнгөрсөн аравдугаар сард дээрх тоо 5.61 сая тонн байв.

Хятад, Австралийн далайн эргийн боомтуудад томоохон, 300 гаруй ачааны онгоц бүтээгдэхүүнээ буулгахаар сар гаруй хүлээж буй аж. Уг нь Австралийн өндөр зэрэглэлийн, хүхэр багатай нүүрсний эрэлт Хятадад нэмэгдэж байгаа гэнэ. Урд хөрш энэ онд нийт 260 орчим сая тонн нүүрс импортлохоор байгааг Нүүрсний үндэсний ассоциац нь мэдэгджээ.

Монгол Улсаас Хятадад нийлүүлсэн нүүрсний хэмжээ арваннэгдүгээр сард 17.8 хувиар буурч, 2.76 сая тоннд хүрснийг мөн тэмдэглэсэн байв. Бас Индонезийнх жилийн өмнөхөөс 33.9 хувиар багасаж, 3.41 саяд хүрчээ. Харин Оросынх 10.9 хувиар нэмэгдэн, 1.92 сая тонн болсон байна.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)