Канадын хөрөнгө оруулалтаар Монгол Улсад хэрэгжүүлж буй уул уурхайн төслүүдийн тоог нэмэгдүүлнэ

Уул уурхай, хүнд үйлдвэрийн сайд Г.Ёндон 2020 оны 10 дугаар сарын 22-ны өдөр Канад Улсаас Монгол Улсад суугаа Элчин сайд хатагтай Кэтрин Ивкофтой уулзалт хийв.

Уулзалтын  үеэр УУХҮ-ийн сайд Монгол Улсын Засгийн газрын 2020-2024 оны үйл ажиллагааны хөтөлбөрт Уул уурхай, хүнд үйлдвэрийн яамнаас тусгуулсан дэд зорилт, арга хэмжээнүүд болон ирэх 4 жилд геологи, уул уурхай, газрын тос, хүнд үйлдвэрийн салбарт баримтлах бодлогын талаар танилцуулав.

Түүнчлэн Канад Улсын Засгийн газрын тусламжаар хэрэгжиж буй СЕСМИМ болон МЕРИТ төслийн талаар талууд санал солилцож СЕСМИМ төслийг амжилттай хэрэгжүүлж дууссаныг цохон тэмдэглэв.

Элчин сайд Кэтрин Ивкофын зүгээс Канад Улсын хөрөнгө оруулалтаар Монгол Улсад хэрэгжиж буй уул уурхайн томоохон төслүүдийн талаар санал, бодлоо хуваалцаж цаашид Монгол Улсад хэрэгжүүлэх төслүүдийн тоог олшруулж хоёр орны харилцаа, хамтын ажиллагааг өргөжүүлэхийг эрмэлзэж буйгаа илэрхийлэв.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)