Йоханнес Тиннес Бе

Норвегийн биатлонч. 1993 оны тавдугаар сарын 16-нд Норвегийн Стрюн хотод төрсөн. Осло хотод амьдардаг. “Markane IL” багт харьяалагддаг. Өндөр 187 см, жин 80 кг.

2018 оны Пёнчаны олимпын наадмын, дэлхийн долоон удаагийн (2015-2019) аварга, 2018-2019 оны “Дэлхийн цом”-д нийлбэр дүнгээр тэргүүлсэн.

Биатлоны “Дэлхийн цом”-д нийт 59 ялалт байгуулсан амжилтаар тус тэмцээний түүхэнд эхний тавд багтдаг. 2009 оноос эхлэн биатлоны спортоор хичээллэж эхэлсэн бөгөөд залуучуудын ДАШТ-д гурван удаа түрүүлсэн. Улмаар 2012 онд насанд хүрэгчдийн шигшээ багт дуудагдсан хамгийн залуу биатлонч болжээ.

2013 оны арванхоёрдугаар сарын 14-нд “Дэлхийн цом”-ын гараанд (спринт) анх удаа түрүүлж, маргааш нь цуваа гараанд тэргүүлсэн. 2018-2019 оны улиралд Й.Бе “Дэлхийн цом”-ын ганцаарчилсан уралдаанд 16 удаа тэргүүлж, М.Фуркадын тогтоосон дэлхийн дээд амжилтыг шинэчилсэн. Энэ улирлын биатлоны “Дэлхийн цом”-ыг илт давуу тэргүүлж буй.

Ах Тарьей нь мөн биатлоноор хичээллэдэг, олимпын аварга. Й.Бе 2018 онд Хедде Делитэй гэрлэсэн. Хоч нь “улбар шар үст доминатор”.

Бэлтгэсэн: Н.Баяр


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)