З.Баянсэлэнгэ шүүх бүрэлдэхүүнээс татгалзлаа

УИХ-ын гишүүн, Барилга хот байгуулалтын сайдаар ажиллаж байсан З.Баянсэлэнгэ болон иргэн М.Болортуяа нарт холбогдох албан тушаалаа урвуулан ашигласан хэргийг Сонгинохайрхан дүүргийн Эрүүгийн хэргийн анхан шатны шүүхэд өчигдөр хэлэлцэхээр товлосон байсан юм. Гэвч шүүх хурал тодорхойгүй хугацаагаар хойшилжээ.

Учир нь шүүгдэгч З.Баянсэлэнгэ тус шүүхийн ерөнхий шүүгч Ц.Оюунчимэг тэргүүтэй шүүх бүрэлдэхүүнээс татгалзсан байна. Хурал даргалагч шүүгч нь тус шүүхийн ерөнхий шүүгч учраас шүүгчээс татгалзах З.Баянсэлэнгийн саналыг шүүгчдийн зөвлөл хүлээн авах, эсэхийг хэлэлцэн шийдвэрлэх болсон аж.

Сайдаар ажиллаж байхдаа З.Баянсэлэнгэ албан тушаалаа ашиглаж, “Бэрэн групп”-ийн барьсан “Хангай” хотхоны орон сууцнаас 123 байрыг тендер зарлалгүй, шууд худалдан авч, улсын төсөвт 972.4 сая төгрөгийн хохирол учруулсан гэх хэрэгт холбогдсон.

Шүүх хуралд прокурор, өмгөөлөгч нарын хүсэлтээр хэрэгт ач холбогдолтой мэдүүлэг өгнө гэж үзэж, гэрчээр тухайн үед Ерөнхий сайд асан Ч.Сайханбилэг, Шадар сайдаар ажиллаж байсан Ц.Оюунбаатар, Сангийн сайд асан С.Баярцогт, ТОСК-ын захирлаар ажиллаж байсан А.Гантулга, ЗГХЭГ-ын тэргүүн дэд даргаар ажиллаж байгаад саяхан ҮХЦ-ийн гишүүн болсон Ш.Солонго нарын хүнийг дуудаад буй юм.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)