Жерар Батлер

Бэлтгэсэн: Н.Энхтүвшин


Дахиад л даваа гариг. Ажлын долоо хоногийн эхний өдөр. Ажилдаа дуртай нэгэнд энэ нь шинэ төлөвлөгөө, шинэ төсөл, шинэ бэрхшээл, үр дүн, аз, сорилт, таашаал бол ажилдаа дургуй нэгэнд ял шийтгэл байдаг.

“Morton Frazer” компанийн шилэн лифтээр яг л ийм ял шийтгэл хүлээсэн мэт царайтай залуу өгсөх аж. Тэрбээр урьд шөнө нилээд уусан бололтой амнаас нь эвгүй эхүүн үнэр ханхийнэ. Шотландын хамгийн том, нэр хүндтэй хуулийн компани “Morton Frazer”-д ажилд орох гэж хүмүүс мөрөөдөж, бараг зүүдэлдэг байхад анхны ярилцлагаараа л орж чадсан энэ залуу өөрийнхөө хувь заяанд сэтгэл хангалуун биш бололтой. Тиймдээ ч тэрбээр “Morton Frazer”-д хоёр жил ажиллахдаа сархадыг нилээн сайн зооглох болжээ.

Ажилдаа дур сонирхолгүй, нэг ёсондоо аз жаргалгүй энэ залууг Жерард Батлер гэх бөлгөө.

Тэрбээр Глазко хотын хуулийн дээд сургуулийг онц дүнтэй дүүргэжээ. Зүгээр ч онц сурсангүй. Батлер сургуулийнхаа оюутны холбооны ерөнхийлөгч, хотынхоо шилдэг тамирчин, рок хамтлагийн дуучин, бас тун ч царайлаг залуу байлаа. Ийм гайхалтай сайн тодорхойлолттой залуу ажилд орох хүсэлтэйгээ илэрхийлэхэд “Morton Frazer” компани эхний ярилцлагын дараа л авахаар шийджээ. “Ноён Батлер таны мөрөөдөл биелэлээ оллоо. Та манай компанид ажиллах болсон” гэж захирлын туслах Жерардад баяр хүргэхэд залуу “Мөрөөдөл гэж юу байдгийг чи мэдэхгүй л дээ” хэмээн дотроо бодсон гэдэг.

Харин түүний мөрөөдөл бол жүжигчин болох байлаа. Батлер энэ тухай бүр багаасаа мөрөөддөг байжээ. Түүнийг бага байхад гэрийх нь ойролцоо кинотеатр байх. Жаалхүү мөнгө л олдвол кинотеатр руу чавхдчихна. Тэгээд үзсэн киноныхоо баатаруудыг дууриан найзууддаа жүжиглэж үзүүлдэг байв. Нэг удаа Батлер жүжгийн дугуйланд шалгуулмаар байгаагаа ээждээ хэлжээ. Яагаад ээж нь тэгэхэд зөвшөөрснийг Батлер одоо ч ойлгоддоггүй аж. Учир нь ээж нь хүүгээ өмгөөлөгч болгоно гэж боддог байв.

Жерард жүжгийн дугуйланд тэнцээд зогсохгүй ердөө гурван сарын дараа Шодтландын Залуучуудын театрт тоголдог болжээ. 1981 онд Батлер Глазко хотын Хааны театрт нэгэн жүжгийн тавилтанд алдарт Оливерын дүрд тогложээ. Тэгэхэд Жерард ердөө 12 настай байв. Жүжгийн дугуйлан, каратэгийн секц, гитар, бөмбөр . . . Энэ бүхэн Батлерын суралганд муугаар нөлөөлсөнгүй. Тэрбээр тэргүүний сурагч байсаар сургуулиа онц дүнтэй төгссөн аж.

Ингээд ирээдүйн мэргэжлээ сонгох цаг ирэхэд Жерард эцэг эхээсээ зөрж чадалгүй Глазкогийн их сургуулийн хуулийн ангид элсэн оров. Тэрбээр их сургуульдаа ч тэргүүний оюутан байсаар онц дүнтэй төгссөн байна.

Лифтэнд Батлерын хамт компанийн захирлын туслах явж байлаа. Тэрбээр Жерардаас ханхийх архины эхүүн үнэрийг тэвчин ядаж байгаа бололтой ярвайна. Жерард архи уудаг гэдгээ сүүлийн үед бүүр нуухаа ч байсан аж. Үдийн хоолны дараа халамцуу явах нь энүүхэнд болжээ. Энэ удаа ч Жерард захирлын туслахаасаа зовсон шинж огт харагдсангүй. Түүний толгойд аавынх нь тухай бас үхлийн тухай бодол эргэлдэнэ. . .

Батлерыг хоёр настай байхад эцэг эх нь салжээ. Ээжийнх нь хоёр дахь нөхөр муугүй хойд эцэг байсан ч Батлер түүнийг аав гэж дуудаж хэзээ ч чадаагүй гэдэг. Католик шашны бага сургуульд сурч байхдаа тэрбээр бурхнаас жинхэн аавыгаа нэхэн залбирдаг байсныгаа одоо ч санадаг аж. Шөнө орондоо ороод аавыгаа хөрш айлын өвгөн Том, эсвэл Санта-Клаусын дүрээр төсөөлөн боддог байв. Арван зургаан нас хүрдэг жилээ тэрбээр нэгэн сонин зүүд зүүдэлжээ. Үзэсгэлэнт нуурын эрэг дээр уранхай хүрэм өмссөн бөгтөр өвгөн цаашаа хараад суух аж. Аав . . .Айдас, бахдал аль аль Жерардыг эзэмдэнэ. Зүүднээс сэрэхэд хөвгүүний хар хөлс нь зутгаж, зүрх нь хүчтэй дэлсэж байв. Тэр жилдээ Батлер аавтайгаа уулзсан байна. “Миний хүү” гэж түүнийг дунд зэргийн насны нүдэнд дулаахан,дажгүй хослол өмссөн эр дуудахад Жерардын дотор хуримтлагдсан гомдол, хорсол, уур бүгд ууршин алга болсон гэдэг.

Батлерыг их сургуулиа төгсөөд удаагүй байтал аав нь хорт хавдраар өвджээ. Тээр жил зүүдэндээ үзсэн үзэсгэлэн нууртай тун ч адилхан нуурын эрэг дээр эцэгтэйгээ шар айраг уугаад сууж байхад аав нь түүнд энэ гунигт мэдээг дуулгажээ. Тэгэхэд аав нь өөрийгөө удахгүй үхэх болсныг маш тайван, ямар нэгэн сэтгэлийн зовлонгоос ангижирч байгаа мэт өнгө аястай ярьжээ.

Тэр үед аавынх нь үхлийн тухай бодож байсан бодол одоо энэ лифтэнд Батлерын толгойд эргэлдэх аж. Ямар ч гарцгүй болсон тохиолдолд үхэл хамгийн оновчтой шийдэл мэт Жерардад санагдана. Тэрбээр гарах гарцгүй болоод байлаа. “Morton Frazer” компанид ирэхээсээ өмнө Жерард Америкийн Лос-Анжелес хот руу жүжигчин болох азаа үзэхээр явжээ. Олон киностуди, театрын хаалгыг татсан ч харамсалтай нь түүний мөрөөдөл биелсэнгүй. Лос-Анжелест хоёр жил болохдоо Жерард ганцхан киноны жижигхээн дүрд л тогложээ. Батлер оюутан байхдаа л хэрэв амиа хорлох шаардлага гарвал өндөр байшин дээрээс нисч үхнэ гэж ярьдаг байжээ. Тэрбээр 1961 оны арваннэгдүгээр сарын 13 нд төржээ. Төрсөн өдөр нь болоход ердөө хоёрхон хоног дутуу байв. Яагаад ч юм бэ түүний толгойд аль эртнээс арван нэгдүгээр сарын 24-ны өдөр л эргэлдээд байжээ. Чухам ямар учиртайг Батлер өөрөө ч ойлгодоггүй байсан бол харин өнөөдөр энэ өдөр үхэх ёстой юм байна гэж боджээ.

Ингээд тэр даваа гаригийн өглөө “Morton Frazer” компаний захирал ноён Споук Жерардыг дуудаж уулзаагүй бол өнөөдөр энэ эрхмэ амьд байх эсэх нь эргэлзээтэй. Ноён Споук Жерардыг өрөөндөө дуудаад их л тайван өнгөөр “Ноён Батлер, танд дээд зэргийн мундаг өмгөөлөгч болох бүх өгөгдөхөнүүд байна. Гэхдээ энэ танд ямар ч хэрэггүй гэдэгт би бас эргэлзэхгүй байна” гэж хэлэхэд Жерард тулгамдаж орхижээ. Уг нь “Та буруу ойлгож байна. Би энэ компанид болон тань шиг мундаг мэргэжилтнүүдтэй ажиллаж байгаагаа нэр төрийн хэрэг хэмээн үздэг” гэж хэлэх байтал түүний амнаас “Таны зөв. Би хууль эрх зүйтэй холбоотой бүхнийг үзэн яддаг. Би энэ тухайгаа чангаар хэлэх цаг ирсэнд бурханд талархаж байна, ноёнтоон” гэсэн аймшигт үгс гарчээ.

“Бид хоёр бараг минут хэртээ өөд өөдөөсөө харан дув дуугай зогссон байх. Агуу өмгөөлөгч дөнгөж эхэлж байгаа нэг муу нусгай. Хууль зүйн аварга акул нэг муу бөөс хоёр” гэж Жерард энэ тухай хожим дурссан байдаг.

“Morton Frazer” коспанийн шилэн лифтээр мөрнөөсөө нэгэн том уул овоо аваад хаячихсан мэт хөнгөн шингэн, мөрөөдөл найдвараар дүүрэн Батлер буужээ. Хүүгийнхээ ухаангүй үйлдлийн тухай сонсоод Батлерын ээж галзуурах шахжээ. Тэрбээр тэр даруй галт тэргэнд суун хүү дээрээ давхиж очин бүхнийг эргүүлэн байранд нь оруулах гэтэл гэнэт нурууны архаг өвчин нь хөдлөн чадаагүй аж. Ээжийгхээ тэр үед бичсэн ур хилэн, гомдол цөхөрлөөр дүүрэн захидлыг Жерард одоо болтол нандигнан хадгалдаг гэсэн.

Ингээд Батлер жүжигчин болохоор эргэлт буцалтгүй шийджээ. Энэ үед л түүний маш шаргуу дайчин чанар илэрсэн гэдэг. Английн театрын нэртэй найруулагч Стивен Беркоффыг гэрийнхээ ойролцоо өглөөний кофегоо уугаал сууж байхад нь нэг жилийн өмнө “Morton Frazer” компанийн лифтэнд амиа хорлох талаар бодож байсан Батлер барьж авч уулжээ. Шекспирын хэдэн шүлгийг уншихыг нь сонсоод Стивен Беркофф өөрийн найруулж буй “Кориолан” жүжигт тоглохыг санал болгосон аж. Энэ бол Батлерын шинэ амьдралын эхлэл байлаа.

Жүжиглэх төрмөл авьяас нь Батлерыг богинохон хугцаанд Их Британий театрын ертөнцөд нэрд гаргажээ. Кино уран бүтээл нь ч гомдоллохооргүй байлаа. Гэхдээ дэлхийд нэрд гарахын тулд түүнд Холливуудыг байлдан дагуулах хэрэгтэй байв. Энэ зам түүнээс багагүй хугацаа шаардсан аж. Үүнд Батлерын шотланд аялага багагүй саад болж байжээ. Дутагдалтайгаа Батлер уйгагүй тэмцсэн гэдэг. Тэгэхдээ Батлер 2004 он хүртэл 20 гаруй Холливудын кинонд тоглосон аж. Тэдгээрийн дотор “Цус сорогч 2000” \“Dracula 2000” \, “Дуурийн сүнс” \“The Phantom of the Opera”\ бүтээлүүд нь үзэгчдийн төдийгүй мэргэжлийн шүүмж судлаачдын анхаарлыг ихээд татсан байдаг.

2005 онд “Warner Brothers” кинокомпани Фрэнка Миллерийн зохиолоор сэдэвлэсэн “300” хэмээх төсөл дээр ажилааж байлаа. Уг киноны найруулагчаар ажиллаж байсан Зак Снайдер бүтээлийн гол дүр болох Леонид хааны дүрд Жерард Батлерыг онилоод байв. Гэвч “Warner Brothers” компаний захирал Алан Хорн найруулагчийн сонголтыг яагаад ч хүлээн зөвшөөрөхгүй байлаа. Тэрбээр энэ төслийг амжилтанд хүрнэ гэдэгт маш их эргэлзэж байсны дээр хазгай хэлтэй нэг нөхрийг гол дүрд шургуулаад байсанд бухимдаж гүйцээд байв. Алан Хорн энэ дүрд Брэд Пит яг тохироно хэмээн эргэцүүлж байтал түүний бодлыг найрийн бичиг нь таслан “Нэг солиотой нөхөр өөрийгөө спарт хүн байна. Таньтай яаралтай уулзах хэрэг гарлаа гээд байх юм” гэжээ. Тэр солиотой хүн нь Жерард Батлер байжээ. Чухам юу ноён Хорны бодлыг өөрчилсныг мэдэхгүй. Ямар ч байсан Батлер “300” тоглох болсон аж. Эл бүтээл түүнийг дэлхийд таниулсан юм.

Жерард Батлер одоо Холливудын хамгийн өндөр үнэтэй, хамгийн эрэлт хэрэгцээтэй жүжигчдийн тоонд ордог. Түүний амьдрал бараг цаг минутаар төлөвлөгдсөн байдаг агаад хувийн амьдралаа зохиох зав чөлөө олддоггүй бололтой. Ямар ч байсан “Та хэзээ гэрлэх вэ” гэсэн асуултанд Жерард “Амжихгүй байна” гэж хариулах дуртай аж. Шинэ кино эсвэл жүжгийнхээ нээлтэнд тэрбээр үргэлж ээжийгээ дагуулж ирдэг. Тэртээ цагт аз жаргалгүй, бүтэлгүй хуулийн ажилтан байсан Батлерын толгойд одоо өндөр байшин дээрээс үсрэх бодол огт орж ирдэггүй гэсэн.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)