Жаргалант, Цэцэг сумын замын хөдөлгөөнийг нээжээ

Ховд аймагт гоц халдварт тарваган тахлаар хоёр хүн өвчилсний улмаас Жаргалант, Цэцэг сумаас орох, гарах тээврийн хэрэгслийн хөдөлгөөнийг өнгөрсөн сарын 29-ний 22.00 цагаас эхлэн тодорхойгүй хугацаанд хязгаарласан. Өвчилсөн хоёр иргэний нэгдүгээр хавьтлын хүмүүсээс тарваган тахал илрээгүй, мөн уг халдварын нууц үе болох зургаан хоног өнгөрсөн тул дээрх хоёр сумын замын хөдөлгөөнийг өчигдөр нээжээ. Энэ талаар Ховд аймгийн Онцгой байдлын газрын дэд дарга, дэд хурандаа Г.Нэргүй “Жаргалант сумын замын хөдөлгөөнийг өнөөдөр (өчигдөр) 12.00, Цэцэг сумынхыг 14.00 цагт нээлээ. Тарваган тахлаар өвчилсөн хоёр хүний биеийн байдал хүндэвтэр хэвээр. Тэдний нэгдүгээр хавьтлын хүмүүсээс шинжилгээ авахад хариу нь сөрөг гарсан. Мөн хоёрдугаар хавьтлын хүмүүсийг түүврийн аргаар шинжлэхэд өвчин илрээгүй. Аймаг, сумын иргэдэд тарвага агнахгүй байх, халдвараас урьдчилан сэргийлэх талаар мэдээлэл тогтмол өгч байна” гэв.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)