Египет хөлбөмбөгчин дээд амжилт тогтоосон ч баг нь ялагдлаа

Египетийн хөлбөмбөгийн шигшээ баг ДАШТ-ий хэсгийн сүүлчийн тоглолтоо хөрш орон Саудын Арабын эсрэг хийсэн. Саудууд тоглолтын турш илүүрхсэн ч гоолын боломжуудаа ашиглаж чадахгүй байлаа. Тухайбал, торгуулийн цохилтоо хүртэл гоол болгож чадаагүй. Уг цохилтыг хааснаараа 45 настай Египетийн хаалгач Эссам Эль-Хадари дэлхийд алдаршлаа. Учир нь тэрбээр тус тоглолтод оролцсоноор Колумбын Фарид Мондрагоны 43 насандаа тогтоосон дээд амжилтыг эвдсэн. Мондрагон ДАШТ-д оролцсон хамгийн ахмад тоглогчийн алдрыг зүүж байв. Хэдий Эль-Хадари рекорд тогтоож, пенальт хаан мандсан ч гэлээ багаа хожигдлоос аварч чадсангүй. Саудууд Арабын ертөнцийн өрсөлдөөнд ялах туйлын их хүсэлтэй байсан тул тоглолтын сүүлчийн минут хүртэл зүтгэсээр 95 дахь минутад гоол оруулснаар 2:1-ээр хожив. Энэ улиралд одтой тоглосон Мохамед Салах багаа аварч болох байлаа. Тэрбээр 22 дахь минутад оруулсан гоол дубль болгох боломжтой байсан ч түүнийгээ ашиглаж чадсангүй. Салах ДАШТ-д хоёр гоол оруулсан ч Египет нэг ч оноо авалгүй гэртээ буцаж байна.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)