Дуут сумынхан ундны усандаа санаа зовохгүй болов

Ховд аймгийн Дуут сумын төвийн худаг, иргэдийн ундны усны эх үүсвэр болсон Ямаат, Цахир, Хөх булаг, Хөндлөнгийн булгийн усанд химийн хорт бодис болох уран зөвшөөрөгдөх дээд хэмжээнээс 36.7 хувь буюу 2.8 дахин их байгааг Геологийн төв лабораторийнхон хоёр удаагийн шинжилгээгээр тогтоосон.

Үүнээс улбаатайгаар иргэд ундны усны шинэ эх үүсвэртэй болох шаардлага тулгараад байв. Энэ бэрхшээлийг шийдэх зорилгоор тус суманд өнгөрсөн онд улсын төсвийн 100 сая төгрөгөөр “Ундны усны эрүүл ахуйг сайжруулах” төсөл хэрэгжүүлж, 47 метр гүн худаг шинээр гаргасан. Мөн хуучин худагт ус цэвэршүүлэх төхөөрөмж суурилуулсан байна. 

Гэвч эдгээр эх үүсвэрүүдээс гарсан ус аюулгүй, эрүүл ахуйн шаардлага хангаж байгаа, эсэхэд иргэд эргэлзсээр иржээ. Орон нутгийн удирдлага “Ундны усны эрүүл ахуйг сайжруулах” төслийн үр дүнг үнэлэхээр саяхан сумын төв дэх худгуудаас дээж авч, мэргэжлийн байгууллагуудаар шинжлүүлэхэд “Эрүүл ахуйн шаардлага хангасан. Цэвэршүүлсэн устай дүйцэх үзүүлэлттэй байна” гэсэн хариу гарчээ.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)