Г.Угалзцэцэг ДАШТ-ээс дөрөв дэх түрүүгээ хүртлээ

Тайландад уржигдар дууссан бодибилдинг, фитнесийн насанд хүрэгчдийн ДАШТ-ий эхний өдөр монгол тамирчид мөнгө, хүрэл медаль тус бүр гурвыг хүртсэн талаар бид өмнө нь мэдээлсэн. Тэмцээний сүүлчийн өдөр ОУХМ Г.Угалзцэцэг түрүүлж, ДАШТ-ий хүрэл медальт, Азийн аварга Г.Гансаруул мөнгөн медаль хүртэв.

Эл спортоор зургаан жил хичээллэж буй Г.Угалзцэцэг дэлхийн дэвжээнд дөрөв дэхээ түрүүлэхдээ хоёр алтан медаль хүртэн шуугиуллаа. Хөвсгөл аймгийн Алаг-Эрдэнэ сумын харьяат тэрбээр эмэгтэйчүүдийн атлетик төрлийн 165 см болон 30-40 насны ангилалд дэлхийн аварга болсон юм. 

Монголын бодибилдинг, фитнесийн спортын түүхэнд нэг жил ДАШТ-ээс хос алтан медаль хүртсэн тамирчин үгүй. Эл спортын түүхэнд дэлхийн дэвжээнд түрүүлсэн анхны монгол эмэгтэй тамирчин Г.Угалзцэцэг ийнхүү дахин анхдагч болов. Хэдийгээр бодибилдинг, фитнесийн спорт олимпын бус төрөл ч дэлхийн дэвжээнд таван удаа Төрийн дууллаа эгшиглүүлнэ гэдэг яах аргагүй давтахад бэрх амжилт. 

Азийн АШТ-ий гурван түрүүтэй түүний охин М.Мойлоо энэ жил ДАШТ-ээс хүрэл медаль хүртсэн. Ээж, охин хоёр нэг жил дэлхийн дэвжээнээс адил спортын төрлөөр медаль авсан нь ховор тохиолдол. Манай тамирчид өнөөдөр эх орондоо ирнэ.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)