Говьсүмбэрт цаг агаарын аюулт үзэгдэл болжээ

Говьсүмбэр аймагт өчигдөр 10.00 цагаас шороон шуурга шуурч, үзэгдэх орчин хязгаарлагджээ. Энэ талаар тус аймгийн Онцгой байдлын газрын урьдчилан сэргийлэх асуудал хариуцсан мэргэжилтэн, хошууч В.Гэрэлчимэг “Манай аймагт 10.00-12.00 цагийн хооронд салхи хүчтэй салхилж, шороогоор шуурлаа. Ойр орчмын үзэгдэх орчин хязгаарлагдан, тэнгэр харанхуйлсан. Салхи секундэд 16-18 м хүрвэл хүчтэй, түүнээс дээш бол аюулт, харин 24 м-ээс дээш бол гамшигт үзэгдэл гэж тооцдог. Манай аймагт салхи секундэд 18 м хүрч салхилж, цаг агаарын аюулт үзэгдэл боллоо. Одоогийн байдлаар салхины хүч суларсан ч шороон шуургатай байна” гэв. Хүчтэй салхины улмаас иргэд, албан байгууллагад хохирол учраагүй ч ахуйн гал гарах эрсдэл өндөр болдог аж. Тиймээс гал түймрээс сэргийлэхийг иргэдэд анхааруулсан байна.

Энэ өдрүүдэд Хэнтий, Сүхбаатар, Дорноговийн нутаг, Төв аймгийн зүүн, Дорнодын баруун хэсгээр салхи секундэд 18-20 м хүрч ширүүсэхийг Цаг уур, орчны шинжилгээний газраас сэрэмжлүүлэв.

Бэлтгэсэн: Ч.Туяа 


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)