Бадминтонч М.Батдаваа дэлхийн чансааны 202-т бичигджээ

“Сокол” ХХК-ийн нэрэмжит бадминтоны насанд хүрэгчдийн болон сонирхогчдын УАШТ Орхон аймгийн “Хангарьд палас”-т өчигдөр эхэллээ. Эхний хоёр өдөр болсон насанд хүрэгчдийн УАШТ-д 11 аймгийн 54 тамирчин, харин 25-наас 27-нд зохион байгуулах сонирхогчдын тэмцээнд 12 аймгийн 130 гаруй бадминтонч өрсөлдөх юм. Уг тэмцээнийг 16 дахь удаагаа зохион байгуулж байна. Бадминтоны тамирчдаас олон улсын хэмжээний мастерын болзол хангасан М.Батдаваа “Токио-2020” олимпод оролцохоор эрхийн оноогоо цуглуулж байна. Тэбрээр дэлхийд чансаагаараа 202-т бичигджээ. Мөн тамирчин Э.Сумъяасүрэн өнгөрсөн жил Хятадад болсон Азийн аваргын ганцаарчилсан төрөлд шигшээ 16-д үлдсэн талаар Бадминтон сонирхогчдын холбооны сургалт, спорт хариуцсан мэргэжилтэн Ө.Ишхүү хэллээ. Бадминтон сонирхогчдын холбоог 1999 онд найман тамирчны бүрэлдэхүүнтэй Орхон аймагт байгуулж байжээ. Одоогоор эл спорт 16 аймагт хөгжиж, сонирхогчид ч нэмэгдсэн аж. Эл спорт нь 2000 гаруй жилийн өмнө Грек, Хятадад үүсэж, 180 гаруй улсад өндөр хөгжжээ. 1992 оноос эхлэн олимпын наадамд таван төрлөөр багтах болсон гэнэ.

Бэлтгэсэн: Б.Лхам-Эрдэнэ


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (3)