Азийн шилдгүүдийн өрсөлдөөн Монголд эхэллээ

Бөхийн төрлүүд (чөлөөт бөх, сонгомол)-ийн 23 хүртэлх насны ангиллын Азийн аварга шалгаруулах тэмцээн “Буянт-Ухаа” спорт цогцолборт өнөөдөр эхэлнэ. Анх удаагийн тэмцээнд Монгол, Иран, БНХАУ, Казахстан, Энэтхэг зэрэг 12 орны 200 гаруй тамирчин өрсөлдөж байна. 

Япон бөхчүүд Дэлхийн бөхийн нэгдсэн холбоо (UWW)-ны бүртгэлээс хоцорсны улмаас зодоглож чадаагүй. Азийн дэвжээнд Монголоос 23 хүртэлх насны ДАШТ-ий хүрэл медальт Г.Ганхуяг, Ц.Намуунцэцэг, дэлхийн залуучуудын дэд аварга Э.Дэлгэрмаа, Б.Халиунаа, өсвөр үеийн ДАШТ-ий хүрэл медальт Б.Хонгорзул, өсвөр үеийн Азийн аварга Т.Тулга, Ө.Пүрэвсүрэн тэргүүтэй 30 бөх барилдана.

Бусад орноос насанд хүрэгчдийн Азийн АШТ-ий хүрэл медальт, өсвөр үе, залуучуудын Азийн аварга Улукбек Жолдошбеков тэргүүтэй олон шилдэг Монголын дэвжээнд хүч сорих юм. Үүний сацуу “Бээжин-2008” олимп, “Баку-2007” ДАШТ-ий аварга Рамазан Шахин, “Афин-2004” олимпын мөнгө, “Нью-Йорк-2003” ДАШТ-ий хүрэл медальт, 1996, 1998 оны Дэлхийн цомын аварга, “Бангкок-1998” Азийн наадмын аварга, Азийн АШТ-ий таван медальтай Алиреза Резаи нар улсынхаа бөхчүүдийг дасгалжуулахаар ирлээ. Азийн АШТ энэ сарын 24-нд дуусаж, жин тус бүрийн аваргаа тодруулна.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)